Neste taller, os participantes mergulláronse na hibridación das técnicas cerámicas e os biomateriales da contorna, para capitalizar os coñecementos e técnicas locais de manipulación da arxila e as fibras vexetais (liño, vimbia, castañas) honrando a tradición e a historia da comunidade que habita a paisaxe local, e sempre mirando o futuro.

Crearase un documento narrativo – un libro de artista para a galería Vilaseco – que resumirá os experimentos realizados no taller e reflectirá a riqueza dos recursos dispoñibles na contorna e o aproveitamento que a poboación local soubo extraer deles, así como as novas posibilidades de uso que albiscamos. Xerarase tamén un arquivo que recompile a experimentación biocerámica resultante do taller e as técnicas tradicionais locais que sirva como un recurso inspirador para futuras xeracións de artesás e deseñadoras.

BIOCERÁMICA: Narrativas da paisaxe e a súa cultura constituíu tamén unha oportunidade para aprender das técnicas culturais e recursos locais desde unha mirada aberta e experimental, capaz de explorar novas contemporaneidades materiais.

Propúxose hibridar saberes e técnicas tradicionais vinculadas o aproveitamento dos materiais da contorna con novas expresións contemporáneas creadas a partir da experimentación entre cerámica
e biomateriales. Deste xeito, o taller invitou a crear unha ponte entre saberes tradicionais e deseño contemporáneo, así como un tecido de creadores que acurtou a distancia entre artesáns locais e deseñadores contemporáneos.

O taller puxo a mirada no potencial da contorna rural como xerador de novas vías de desenvolvemento culturais, sociais, medioambientais e económicas futuras. É na contorna rural onde se axuntan materialidade, natureza e saberes tradicionais, onde se abren outras posibilidades de relación co medio social, cultural e produtivo, e novas oportunidades de deseños e futuros que posibiliten outras ecoloxías máis sensibles coa contorna.